14/03/2013 11:38:55

Fryhen lumenjtë, rritet niveli i ujit nëpër zonat periferike

Shtëpi të tëra bllokohen nga niveli i ujit që ka pushtuar oborret e tyre

SHKODËR - Reshjet e dendura të shiut, që hera heres shoqërohen edhe me një breshër kokërmadh, i paparë prej vitesh në Shkodër, kanë filluar të krijojnë problemet e para, sidomos në lagjet periferike të qytetit, ku më e prekur në këtë drejtim shfaqet lagja Mark Lula.

Shtëpi të tëra në këtë zonë janë bllokuar nga niveli i ujit që ka pushtuar oborret e tyre. Banorë të kësaj zone, të ardhur kryesisht vitet e fundit nga zonat e thella malore, pohojnë se uji ka depërtuar brenda mjediseve të shtëpive, duke shkaktuar edhe dëme materiale.

Bashkia, ka dërguar në terren grupet e punës, të cilët po punojnë për normalizimin e situatës.

Intensiteti dhe ritmi i lartë i reshjeve gjatë dy-tre ditëve të fundit, ka sjellë një rritje të konsiderueshme të nivelit të Liqenit të Shkodrës, por pa asnjë rrezik për të kapur kuotat maksimale që rrezikon përmbytjen. Problematike situata paraqitet në rrjedhen e lumit Kir.

Nga një lumë, përgjithësisht i mbuluar nga thatësira, gjatë periudhës së reshjeve, nga prurjet e shumta të përrenjve të zonave malore të Dukagjinit, niveli i ujit në të është rritur ndjeshëm.

Ndërkohë që tendenca për të dalë nga shtrati ka edhe në pjesen kufizuese me lagjet periferike të qytetit, si dhe fshatin Kuç, ku pjesa më e rrezikuar duket ajo e fshatit Bardhaj, të komunës Rrethina, ku si rezultat i devijimit të shtratit normal të Kirit, rrjedha e ujit ka prekur tokat bujqësore, duke gërryer një pjesë të konsiderueshme të tyre.

Përfaqësues të komunës Rrethina thanë se në rrezik janë rreth 80-të familje, ku përpos dëmit të shkaktuar në gërryerjen e tokës, nëse nuk ndërhyhet me shpejtësi, uji pritet të depërtojë edhe në drejtim të banesave të tyre.

HermesNews - ©2013

Dërgo me email | Stampo artikullin